香港的主題公園，來來去去都係海洋公園又或者係迪士尼樂園。相信好多 lomographers 都去過晒喇！想攪攪新意思？大家不妨「稍移玉步」，去一去我今次介紹的廣州長隆旅遊渡假區喪玩一番！
香港的主題公園，來來去去都係海洋公園又或者係迪士尼樂園。相信好多 lomographers 都去過晒喇！想攪攪新意思？大家不妨「稍移玉步」，去一去我今次介紹的廣州長隆旅遊渡假區（下稱「長隆」）喪玩一番！講到明係喪玩，因為長隆入面有歡樂世界、水上樂園、野生動物園、大馬戲。通常去得玩都玩兩三個景點玩足兩日一夜先夠盡興！
先介紹歡樂世界，如果大家係想追求刺激的話，咁就一定要試試園內的垂直過山車、十環過山車、摩託過山車呢幾個過山車。而唔怕濕身的又可以去玩玩叢林漂流、急流勇進喎。但記得到時幫襯買一套防濕雨衣！哈哈，如果唔係就真係後果自負啦！但係玩的時候記得唔好拎埋你地的相機去玩，因為咁做係好危險呢！
而想輕輕鬆鬆玩一啲小型機動遊戲，又可以玩下墨西哥草帽、碰碰車、雙層夢幻轉馬等等！除外可以重溫兒時回憶，仲可以拎埋你地的相機不停咁影，為你地的好朋友們留下純真、歡樂、狂歡的一面！我個人認為呢個一班人去玩的情況下，最好就有部 Lomography Spinner 360° 旁下身。要影大合照都唔使叫人幫手，仲可以拍下雙層夢幻轉馬究竟有幾轉添啊？！而因為當時去玩的時候未有呢部相機，我唯有用一部裝上了魚眼鏡的相機放在地上，由下至上的拍下一張大合照！哈！效果都好正！
而我上次去的時候就約齊三五知己，一行大約十人浩浩蕩蕩咁由香港出發北上！當日的天氣唔係咁好，香港仲係落梗雨，但係因為入場票，酒店所有野都已經 book 好晒，唯有天氣差都要上去玩啦！
去到深圳再搭火車去廣州都係一個小時車程左右，隨即去酒店 check-in 放低行李就即刻去歡樂世界玩啦！去到廣州又好好彩咁無雨，但係個天仍然係天黑黑啦。不過咁樣都起碼可以玩到歡樂世界入面的機動遊戲嘛。
歡樂世界入面有好多好多的機動遊戲，多到我都唔記得自己邊啲有玩過，邊啲無玩過啦。而又因為天氣唔係咁好，所以入場玩的人都唔多，好多機動遊戲都係排半個鐘之內都有得玩啦！
玩左一整個下午，來到六點幾，但其實行程都仲未完，因為玩完仲會去睇大馬戲。香港睇馬戲的機會唔多，所以大家記得把握機會睇，有空中飛人呀，有小丑，有唔同的動物做出好多高難度動作呀。可以話係目不暇給，但如果要拍下過程，咁就要記得帶定高 ISO 的菲林喇！
睇完大馬戲，第一日的行程都暫告一段落！
第二日係去水上樂園玩。天氣都有所好轉，有少少陽光！但有時好天都唔一定係好事，因為水上樂園人頭湧湧，我地排隊玩「超級大喇叭」都排左一個多小時。而就在玩完「大喇叭」之時，天有不測之風雲，突然下了一場大雷雨。我地當然搵地方避雨啦！而雨過後也沒有天晴，天陰陰，但人潮卻忽然消失！之後玩水上遊戲，大多數都唔使排隊。爽！
個人推薦的水上遊戲有超級大喇叭，噴射滑道，合家歡滑道同埋大滑板！真係好好玩。而玩噴射滑道時更有友人玩到「反艇」！十分驚險刺激！仲有呀，記得帶你地的防水相機，好似 Lomo LC-A+ Underwater Flare Bundle 先可以為好友們留下瘋狂一刻！（可惜自己無，所以今次係無水上樂園的相可以提供……）
玩完水上樂園，長隆之旅亦都宣佈正式結束。之後就搭火車返香港！
後記：
話說瘋狂玩樂之旅結束後， facebook 都會不停會有有關是次長隆之旅的相片被 upload ，而各參與者都收到數以百計的 notification 告知自己已經俾人 tag 左上其他友人拍下的照片上。而呢個情況竟可以長達兩個多月，因此朋友們都叫今次的旅程為「長隆不死之旅」！
有關資料：
大家可以上網搵搵本港的旅行社睇下有咩酒店連門票的優惠套票。如果只係想預先購買門票，又可以去中旅社買！
中旅社網頁： http://www.ctshk.com/home.htm
廣州長隆旅遊渡假區官方網頁： http://www.chimelong.com
0個留言
Please login to comment this article. If you don't have an account yet register one – additionally you can sign in with Twitter or Facebook. Opinion is free and discussion is encouraged on lomography.com, however, neither the content nor the ideas expressed in the comments are supported by or representative of the Lomographic Society International.